100 థియేటర్లలో ఎన్టీఆర్ విగ్రహాలు

Posted on : 08/01/2019 06:59:00 pm


మహానటుడు నందమూరి తారక రామారావు బయోపిక్‌గా తెరకెక్కిన ఎన్టీఆర్ సినిమా ఫస్ట్ పార్ట్ ‘కథానాయకుడు’ ఈ నెల 9న ప్రపంచవ్యాప్తంగా విడుదల కానుంది. ఈ నేపథ్యంలో చిత్ర యూనిట్ సుడిగాలి పర్యటనలు చేస్తోంది. సోమవారం ఎన్టీఆర్ స్వస్థలం నిమ్మకూరుతో పాటు బెంగళూరులో పర్యటించిన నటీనటులు ఈరోజు ఉదయం తిరుమలలో శ్రీవెంకటేశ్వరస్వామిని దర్శించుకున్నారు. ఈ సందర్భంగా తిరుపతిలోని పీజేఆర్ థియేటర్లో ఎన్టీఆర్ విగ్రహాన్ని నందమూరి బాలకృష్ణ, కల్యాణ్‌రామ్, విద్యాబాలన్ తదితరులు ఆవిష్కరించారు. 


ఈ సందర్భంగా బాలకృష్ణ మీడియాతో మాట్లాడుతూ గతంలో ఏ చిత్రానికి చేయని విధంగా ‘ఎన్టీఆర్’ సినిమాకు సరికొత్తగా పబ్లిసిటీ చేస్తున్నట్లు తెలిపారు. తెలుగు రాష్ట్రాల్లో ప్రత్యేకంగా ఎంపిక చేసిన 100 థియేటర్లలో ఎన్టీఆర్ 100 విగ్రహాలను ఏర్పాటు చేయనున్నట్లు చెప్పారు. ఈ క్రమంలోనే తొలి విగ్రహాన్ని తిరుపతిలో ఆవిష్కరించినట్లు చెప్పారు. క్రిష్ జాగర్లమూడి దర్శకత్వం వహించిన ఈ చిత్రంలో ఎన్టీఆర్‌గా బాలకృష్ణ, ఆయన భార్య బసవతారకంగా విద్యాబాలన్, ఏఎన్నార్‌గా సుమంత్, శ్రీదేవి పాత్రలో రకుల్‌ప్రీత్ సింగ్ నటిస్తున్నారు. ఎన్టీఆర్ రెండో భాగం ‘మహానాయకుడు’ ఫిబ్రవరి 7న విడుదల కానుంది.