సర్జరీ విజయవంతం.. కోలుకుంటున్నారాకేష్ రోషన్‌

Posted on : 09/01/2019 04:00:00 pm


బాలీవుడ్ వెటరన్ యాక్టర్, దర్శక నిర్మాత రాకేష్ రోషన్ గొంతు కేన్సర్‌తో బాధపడుతున్నారని ఆయన కుమారుడు హృతిక్ రోషన్ చెప్పడంతో సినీ పరిశ్రమ దిగ్భ్రాంతికి గురైన సంగతి తెలిసిందే. తన తండ్రికి గొంతు కేన్సర్ తొలి దశలో ఉందని, చికిత్స కోసం సర్జరీ చేయించుకుంటున్నాడని హృతిక్ తెలిపాడు. అయితే రాకేష్ పరిస్థితిపై ఆందోళన చెందుతున్న అభిమానులకు శుభవార్త. తన గొంతు కేన్సర్‌కు మంగళవారం సర్జరీ దిగ్విజయంగా జరిగిందని, ఒకటి రెండు రోజుల్లో డిశ్చార్జి అవుతానని రాకేష్ తెలిపారు. 

‘నా పరిస్థితి ఇప్పుడు మెరుగ్గానే ఉంది. సర్జరీ సక్రమంగా జరిగింది. గాడ్ ఈజ్ గ్రేట్. శుక్రవారం లేదా శనివారం ఇంటికి తిరిగి వెళ్లిపోతా’ అంటూ రాకేశ్ ప్రకటన చేశారు. సర్జరీ జరుగుతున్న సమయంలో రాకేశ్ భార్య, కుమారుడు హృతిక్, కుమార్తె సునయన, సోదరుడు రాజేష్ రోషన్ ఆస్పత్రిలోనే ఉన్నారని ఆయన సన్నిహిత వర్గాలు తెలిపాయి. 

రాకేష్ రోషన్ కేన్సర్‌తో బాధపడుతున్న హృతిక్ రోషన్ మంగళవారం సోషల్‌మీడియా ద్వారా ప్రకటించారు. ‘నాకు తెలిసినంత వరకూ నాన్నే అత్యంత బలమైన వ్యక్తి. ఆయనకు గొంతు కేన్సర్ వచ్చిందని కొద్ది వారాల క్రితం తెలిసింది. కానీ ఆయన వ్యాధితో పోరాడుతున్నారు. ఆయన లాంటి నాయకుడు ఉండటం కుటుంబ సభ్యులుగా మా అదృష్టం. లవ్ యూ డాడ్’ అని హృతిక్ ఇన్‌స్టాగ్రామ్‌లో పోస్ట్ చేశాడు. హృతిక్ పోస్టు పెట్టగానే అనేకమంది రాకేష్ రోషన్ ఆరోగ్యం మెరుగుపడాలని సోషల్‌మీడియాలో కామెంట్లు పెట్టారు. ప్రధానమంత్రి నరేంద్ర మోదీ సైతం స్పందిస్తూ... రాకేష్ రోషన్ ఆరోగ్యం మెరుగుపడాలని భవవంతుడిని ప్రార్థిస్తున్నట్లు ట్వీట్ చేశారు.