ప్ర‌తి నెలకీ ఓ కథుంది..!

Posted on : 01/01/2018 01:23:00 pm

కొత్త ఏడాది వచ్చేసింది...
కోటి ఆశల్ని తెచ్చేసింది...
కమ్మని కలల్ని పండించేందుకు...
కోరుకున్న లక్ష్యాల్ని చేరుకునేందుకు...
పన్నెండు నెలల కాలాన్ని మనకందించింది...
అందుకే ఆ నెలల వెనుక కథలేంటో తెలుసుకుందాం... పదండి!

పన్నెండు నెలలతో ఇప్పుడు మనం సహా చాలా దేశాలు ప్రామాణికంగా వాడుతున్నది గ్రెగోరియన్‌ క్యాలెండర్‌

ఎవరైనా మనల్ని ‘ఇంగ్లిష్‌ నెలల పేర్లు చెప్పు’ అని అడిగారనుకోండి. గుక్క తిప్పుకోకుండా జనవరి, ఫిబ్రవరి, మార్చి... అంటూ గడగడా చదువుకుపోతాం. మరి ‘ఆ పేర్లు ఎందుకు, ఎలా వచ్చాయి’ అని అడిగారనుకోండి? తెలియదన్నట్టు బేల ముఖం పెట్టేస్తాం. అందుకే ఈ కొత్త ఏడాదిలో సరికొత్తగా నెలల పేర్ల గురించి తెలుసుకుందాం.



జనవరి

జానస్‌ అనే రోమన్‌ దేవుడి పేరు మీద సంవత్సరంలో మొదటి నెలకి జనవరి అనే పేరొచ్చింది. ముందూ, వెనక చూసేలా రెండు ముఖాలతో ఉండే ఈ దేవుడి ప్రతిమను ప్రారంభం, ముగింపులకు ప్రతీకగా చూస్తారు. గాడ్‌ ఆఫ్‌ బిగినింగ్స్‌ అనీ పిలుస్తారు. అందుకే మొదటి నెలకు ప్రారంభాల దేవుడి పేరన్నమాట.

ఫిబ్రవరి

ప్రాచీన ఇటాలియన్‌లు ఫెబ్రువా అనే దేవుణ్ణి కొలిచేవారు. ఆయనను కొలుస్తూ రోమన్‌లు ‘ఫెస్టివల్స్‌ ఆఫ్‌ ప్యూరిఫికేషన్‌’ పేరుతో ఈ నెలలో పండగలు జరుపుకొంటారు. దానిలో నుంచే ఈ నెలకు ఫిబ్రవరి అనే పేరొచ్చింది. అన్ని నెలల్లో ఇదే తక్కువ రోజులున్న మాసమన్న విషయం మనకు తెలిసిందే.

మార్చి

రోమన్‌ క్యాలెండర్‌లో మొదటిది మార్చి నెలే. వారి యుద్ధ దైవం మార్స్‌ పేరు మీదిగా దీనికి ‘మార్చి’ అనే పేరొచ్చింది. ఆయనే మన గ్రహాన్ని సృష్టించాడని వాళ్ల నమ్మకం. అందుకు గుర్తుగా రోమన్‌లంతా ఈ నెలలో వరుసగా పండగలు చేసుకుంటారు.

ఏప్రిల్‌

ప్రాచీన రోమన్‌ క్యాలెండర్‌లో నాలుగో నెల ఏప్రిల్‌. ఏప్రిల్లోస్‌ అనే లాటిన్‌ పదం నుంచి ఈ నెలకీ పేరు వచ్చింది. గ్రీకుల ప్రేమ దేవత అప్రోడైట్‌ పేరు మీదా ఈ పేరొచ్చిందని మరో కథ ప్రచారంలో ఉంది.

మే

గ్రీకు పురాణాల్లో మయ్యా అనే దేవత ఉంటుంది. గౌరవం, మర్యాదలకు ప్రతీకగా ఆమెను కొలుస్తారు. వసంతకాల దేవతగానూ ఆమెను పూజిస్తారు. ఆమె పేరు మీదనే ఈ ఐదో నెలకు ‘మే’ అనే పేరొచ్చింది.

జూన్‌

జునో అనే ప్రాచీన రోమన్‌ దేవత పేరు మీద ఈ నెలకు ‘జూన్‌’ అనే పేరొచ్చింది. రోమన్‌లు ఆమెను ఇంటి దేవతగా కొలుస్తారు. పెళ్లిళ్ల నెలగా దీనికి పేరుంది.

జులై

అన్ని నెలల పేర్లు దేవతలు, దేవుళ్ల పేర్ల మీద వస్తే ఈ మాసం పేరు మాత్రం ఓ రాజకీయవేత్త పేరుమీదొచ్చింది. రోమన్‌ రాజకీయవేత్త జులియస్‌ కేసర్‌ గౌరవార్థం ఈ నెలకీ పేరు. ఎందుకంటే ఆయన ఈసమయంలో పుట్టినందుకట.

ఆగస్ట్‌

మొదటి రోమన్‌ ప్రభువుగా అగస్టస్‌ని చెబుతారు. ఆయన పేరు మీదనే ఈ నెలకు ‘ఆగస్ట్‌’ అనే పేరొచ్చింది. అంతకు ముందు ఈ నెలను ‘సెక్సి్టలిస్‌’ అని పిలిచేవారట. దానర్థం ఆరోది అని. రోమన్‌క్యాలెండర్‌లో ఇది ఆరో నెల.

సెప్టెంబర్‌

సెప్టెమ్‌ అనే లాటిన్‌ పదం నుంచి సెప్టెంబరు అనే పదం వచ్చింది. అంటే ఏడోది అనర్థం. రోమన్‌ క్యాలెండర్‌లో ఈ నెల ఏడోది. అయితే జులియన్‌, గ్రెగోరియన్‌ క్యాలెండర్లలో మాత్రం తొమ్మిదో నెలగా ఉంది.

అక్టోబర్‌

‘ఒక్టో’ అనే లాటిన్‌ పదం నుంచి ‘అక్టోబర్‌’ అనే పదం వచ్చింది. దానర్థం ఎనిమిది. రోమన్‌ క్యాలెండర్‌లో ఇది ఎనిమిదో నెలగా ఉంటుంది. అయితే మన జులియన్‌, గ్రెగోరియన్‌ క్యాలెండర్లలో మాత్రం ఇది పదో మాసం.

నవంబర్‌

‘నవెమ్‌’ అనే లాటిన్‌ పదం నుంచి ‘నవంబర్‌’ నెలకు ఆ పేరొచ్చింది. రోమన్‌ క్యాలెండర్‌లో ఇది తొమ్మిదో నెలగా ఉంది. అయితే మన క్యాలెండర్‌లో మాత్రం పదకొండో నెల.

డిసెంబర్‌

లాటిన్‌ పదం ‘డిసెమ్‌’ నుంచి మన పన్నెండో నెలకు ‘డిసెంబర్‌’ అనే పేరొచ్చింది. డిసెమ్‌ అనే పదానికి అర్థం పది. ఇది రోమన్‌ క్యాలెండర్‌లో పదో నెలగా ఉంటుంది. అందుకే దానికా పేరు. మనకు మాత్రం ఇది పన్నెండో నెల.