బంపర్ ఆఫర్ ఇచ్చిన దావూద్ ఇబ్రహీం

Posted on : 07/03/2018 10:14:00 am

దావూద్ ఇబ్రహీం ఈ పేరు వింటే చాలు పది లోపు చదుకున్నవారెవరైనా ఇట్టే చెప్పేస్తారు ఆయన గురించి, ఆయన నేర చరిత్ర గురించి, దావూద్ మోస్ట్ వాంటెడ్ అండర్ వరల్డ్ డాన్ అని. ఉగ్రవాదులే కాదు అండర్ వరల్డ్ డాన్లు కూడా తమ హక్కులను కాపాడు కుంటూ తమ డిమాండ్లను ప్రభుత్వం ముందు పెడుతున్నారు సంఘ వ్యతిరేక కార్యకలాపాలతో మోస్ట్ వాంటెడ్ క్రిమినల్ దావూద్ ఇబ్రహీం భారత ప్రభుత్వం ముందు ఒక ప్రపోజల్ పెట్టాడు. ఆ ప్రపోజల్ వెనుక దాగున్న మెలికేంటో? దావూద్ పెట్టిన మెలిక వెనుక ఎన్ని చిక్కుముడులు ఉన్నాయో?  ప్రభుత్వానికి ఆయనేం వర్తమానం పంపాడు, ప్రభుత్వం ఆ వర్తమానానికి ఏవిధంగా స్పందించింది తదితర విషయాలేంటో ఓసారి చూద్దాం.


తాను భారత ప్రభుత్వానికి లొంగిపోవాలంటే ?   కొన్ని షరతులు వర్తిస్తాయంటూ దావూద్ తరపు న్యాయవాది ద్వారా ప్రభుత్వానికి దావూద్ వర్తమానం పంపారు. కేసు విచారణ సమయంలో అత్యంత కట్టుదిట్టమైన భద్రత ఉండే అర్థర్ రోడ్ జైలులో తనను ఉంచుతానంటేనే లొంగిపోతానని దావూద్ తెలియజేసినట్టు ఆయన సోదరుడు ఇక్బాల్ కస్కర్ కేసును వాదిస్తోన్న లాయర్ శ్యామ్ కేశ్వాని తెలిపారు. అయితే ఈ షరతులకు ప్రభుత్వం నిరాకరించిందని, దావూద్‌ను అరెస్ట్ చేయలేదని పేర్కొన్నారు. దావూద్ తన షరతుల గురించి చాలా సంవత్సరాల కిందటే సీనియర్ న్యాయవాది రాం జెఠ్మలానీ ద్వారా కేంద్ర ప్రభుత్వానికి తెలియజేసినా, దీనికి అంగీకరించలేదని కేశ్వానీ అన్నారు.

ఆర్థర్ రోడ్డు జైలులో ముంబయి మారణహోమంలో కీలక ఉగ్రవాది అజ్మల్ కసబ్‌ను నాలుగేళ్ల పాటు ఉంచి, 2012లో ఉరితీశారు. దావూద్ మోదీ ప్రభుత్వంతో చర్చలు జరిపారని, ఆయన భారత్‌కు తిరిగొస్తారని మహారాష్ట్ర నవనిర్మాణ సేన అధినేత రాజ్ థాకరే గతంలో వ్యాఖ్యానించారు. అంతేకాదు ఆయన చాలా అనారోగ్యంతో ఉన్నారని, భారత్‌లోనే తుది శ్వాస విడవాలని భావిస్తున్నారని అన్నారు.

మరోవైపు దోపిడీ కేసులో దావూద్ సోదరుడు ఇక్బాల్‌ను థానె పోలీసులు చీఫ్ జ్యుడీషియల్ మేజిస్ట్రేట్ ఆర్‌వీ థమదేకర్ ఎదుట మంగళవారం హాజరు పరిచారు. మిరా రోడ్ బిల్డర్‌ను బెదిరించిన కేసులో కస్కర్, ఆయన సోదరుడు దావూద్, అనీస్‌లపై పోలీసులు అభియోగాలు నమోదు చేశారు. కోర్టుకు హాజరైన కస్కర్‌ను సోదరుడు దావూద్, ఇతర కుటుంబ సభ్యులు ఎక్కడున్నారని న్యాయమూర్తి ప్రశ్నించారు. అయితే తనకు తెలియదని చెప్పిన ఆయన, ఇటీవల దావూద్‌తో ఫోన్‌లో మాట్లాడినట్టు తెలియజేశాడు. అయితే మొబైల్ నెంబరు డిస్‌ప్లే కాలేదని, అతడెక్కడున్నదీ తాను తెలుసుకోలేకపోతున్నానని న్యాయమూర్తికి తెలిపాడు. ఇరు పక్షాల వాదనలు విన్న న్యాయస్థానం కస్కర్‌ కస్టడీని మరో మూడు రోజులు పొడిగించింది.